المساعد الشخصي الرقمي

مشاهدة النسخة كاملة : معايير جودة التطبيقات Quality Of Software



Rise Company
14-08-2016, 23:38
https://www.rise.company/forum/images/imported/2016/08/8.jpg



معني الـ Quality Of Software


كلنا بنستخدم عشرات البرامج و المواقع يوميا و بيقابلنا اللي منها بنقول عليه قوي و سريع و بيقابلنا اللي كله مشاكل
في حبة معايير كده لازم تكون عارفها واللي بيتحدد منها جودة البرمجيات.

القوة / الشدة (Robustness)
ودي بتتحقق من قوة الابلكيشن و انه يتحمل يشتغل لأطول فترة ممكنه من غير ما يضرب او يحصل فيه مشاكل او انه يتحقق من اللي اليوزر بيكتبه من غير ما يبوظ و بالتالي فهو جاهز انك تستخدمه طول الوقت بسلاسة.

الأمان (Security)
كل ما كان السيستم بيحتفظ بملفات و معلومات بشكل أمن وكل ما كان صلاحيات كل شخص للوصول للمعومات متامنه كل ما كان السيستم قوي.

الكفاءة (Performance)
ايه فايدة انك تمتلك أقوي كمبيوتر في العالم لو كان البرامج اللي عليه بطيئة جدا .. علشان كده عامل الاداء مهم جدا في تحديد كفاءة أي سيستم أو موقع.

قابلية التغطية والاحتواء (Scalability)
أوقات كتير شركة ممكن تعمل سيستم و بعد كده الشركة دي تكبر و فروعها تكتر و المستخدمين للسيستم يكتروا
فكل ما كان السيستم بتاعك متصمم انه يكبر مع الوقت بدون مشاكل كل ما ده كان معيار كويس لقوة و كفاءة السيستم أو الموقع.

قابلية الامتداد (Extensibility)
كل يوم احتياجاتنا بتزيد و التطوير في مواقعنا او أنظمتنا بيزيد . فكل ما كان السيستم او الموقع مرن و تقدر تعدله بسهولة او تضيفله مميزات بدون مشاكل كل ما كان جوده موقعك أو السيستم بتاعك عالية
يعني أوقات للأسف بيجيلنا عملاء عايزين يطوروا في مواقعهم ولأن الموقع معمول بطريقة كلها غلط بيكون الاسهل اننا نبدأ من جديد.

الدقة (Accuracy)
كل ما كان السيستم أدق في النتائج اللي بيطلعهالك زي تقارير عن شغلك و ارباحك مثلا كل ما كان السيستم كفاءته عالية.

الصيانة (Maintainability)
كل ما كان السيستم مرن و قابل للصيانة و التحديث كل ما كان كفاءته عالية.

استهلاك الموارد (Resource Consumption)
الاهتمام بالموارد حاجة مهمة أوي وخصوصا في المواقع . لان لو عندك أقوي سيرفر و موقع بطئ و متبرمج وحش هتلاقي الموقع بيسحب كل موارد السيرفر و بيقف كتير.

سهولة الاستخدام (Usability)
كتير مننا بيتعامل مع مواقع و برامج بشكل يومي . تخيل كام مرة دخلت موقع أو استخدمت برنامج ولقيته معقد ومش عارف تستعمله مع انه مفيد جدا
و كام مرة دخلت موقع او استخدمت أبلكيشن و لقيته سهل و سلس معاك . كل ما كان موقعك سهل الاستخدام كل ما كان ده دليل علي كفاءته.