المساعد الشخصي الرقمي

مشاهدة النسخة كاملة : انا وفتحيه ( فتحيه اجاها عريس )



Eng Amr Adel
07-12-2009, 16:29
فتحيه اجالها عريس



فتحيه بدها اياك ضروري ولازم تشوفك اليو م، قالتها اختها ومشت ، قلت لحالي اللهم اجعله خير ، اكيد في مصيبه محضرتها ( الليدي فتحيه ) يا رب تجيب العواقب سليمه



جهزت حالي واطلعت في الموعد والمكان المعتاد والا فتحيه قاعده وبتستنى فيي على غير عادتها لاني انا دايما الي بقعد وبستناها ، وقعدت بجنبها




-ليش تاخرت ؟ ( قالتها بدون ما تطلع في وجهي حتى )
-لا متأخرتش انت الي جاي بدري ، خير شو في ؟
-ومنين بدو يجي الخير طول مني شايفه زقمك ؟ ( قمة الرومانسيه )
-استغفر الله العظيم ، بلشنا يا فتحيه ؟
-شو ؟ أنا كفرت ؟
-فتحيه روقي انا مش ناقص هبلك
-اسمع : لازم تحط حد لهالعلاقه ؟
-فتحيه مالك ؟ ولك انجنيني ؟
-هو انت خليت في راسي عقل ؟
-ليش هو كان فيه بالاصل ؟
-طب خلص
-ولك شو في احكي ؟
-الاسبوع الماضي اجو نسوان عالدار يشوفوني
-ليش هو انت صايره فرجه ؟
-متتخوثش
-نفرتيتي خوف الله ( وضحكت )
-بحكيلك متتخوثش لاكرفتك بهالواد ( شوفوا انتو الرقه ، وحده بتحكي لحبيبها بدي اكرفتك بهالواد )
-طيب احكيلي لليش جايات النسوان ؟
-بدورن بدهن عرايس ( وهي تهرش براسها )
-وانت شو دخلك في الموضوع ؟
-بحكيلك جايات يشفن بنات
-طيب ماشي افهمت ، بدهن بنات ، انت شو علاقتك في الموضوع ؟
-بدهن يشفني انا
-انت ؟
-اه انا
-ليش هو انت بنت ؟
-شو قصدك ؟
-لا لا ولا اشي ، طيب شو الي بدك اياه ؟
-بدي تشوف حل لعلاقتنا مثل ما حكيتلك
-وشو بدك اياني اعمل ؟
-تيجي وتطلبني يا اخي
-شو ؟ اطلبك ؟
-اه تطلبني ، ليش عورة والا كتعه انا يعني ؟
-ما حكيت هيك .... بس ...
-بس ايش ؟
-يا فتحيه يا حبيبتي انت عارفه اني لسا طالب ومخلصتش توجيهي لسا
-وشو يعني بنخطب وعبين ما تخلص دراسه بنتجوز
-اه يعني انا هسا ثاني ثانوي وبعد سنه توجيهي ولما اخلص جامعه بدها اربع خمس سنين وبعدها بدي اكون حالي يعني بدك تستنيني 15 سنه كمان
-15 سنه 15 سنه شو بدنا نساوي
-انت انجنيتي يا فتحيه ؟
-لا انجنيت ولا اشي
-طيب قومي قومي انخلعي روحي



ويا اخوان ما شفتها والا هي ماسكه بخناقي والشرر بطلع من عينيها ومدت ايدها عجيبتها والا هي مطلعه موس ، فتحته وحطته على رقبتي



-شوف ... بقظي عليك ... والله الذبان الازرق ما بخليه يعرف وين انت .. تراها مقبعه معاي عالاخر ( اكيد بتحسدوني على رقة ونعومة فتحيه )


-ولك انجنيتي ؟ فلتي رقبتي وشيلي هالموس
-سؤال واحد وجاوب عليه : انت بتحبني ؟
-الله يجعل حبه الي تطلع في راسك يا فتحيه يا مجنونه
-جاوب
-طبعا بحبك يا خوثه
-ليكون شايف حدا غيري ؟
-هو الي بشوفك بظل عنده نظر تيشوف غيرك ؟
-طيب بجوز يجيني عريس
-لا اتطمني مش رايح يجي حدا
-ولك انت شو بتقول ؟ والله صار جايني 20 عريس
-عشان هيك ولا واحد رجع
-انا الي رفظتهم
-ايوه ... ايوه ... صدقتك
-وظحيت عشانك انت يا معفن
-طيب فلتيني وقيمي هالموس



دشرتني وظبت الموس في جيبتها ورجعت قعدت وطالت شريطه من جيبتها بتيجي قد اللحاف وصارت تمسح في منخيرها وتسمعني من هالسمفونيات الي بحبها قلبك



-فتحيه بدي احكيلك كلمه وبتمنى تفهميني صح ، شوفي يا بنت الناس انا شب لسا في اول حياتي لا فوقي ولا تحتي وانت بنت وبهمك مصلحتك قبل كل اشي ، وانا بقول اذا بيجيك عريس مليح وابن حلال ( لقطه يعني ) قربطي فيه بايديكي وسنانك لانها الدنيا حظوظ والله العالم شو رايح يصير معاي انا



-شو بتقصد ؟
-الله لا يوفقك يا فتحيه كل الي حكيته ومش فاهمه لسا ؟
-لا مش فاهمه
-طيب اسمعي ، احنا بنعرف انو في هالزمان عنتر حب عبله وقيس حب ليلى وروميو حب جولييت وكثير حب عزة ، قوليلي في واحد منهم اتجوز الي بحبها ؟ عنتر عمه رفضه لانه اسود وقيس انهبل ودار في الجبال وروميو قتل حاله بالسم وكثير مات وهو يحكي شعر في عزة ، يعني هذول كلهم نفدوا بجلدهم وانا الي لازم اكسر القاعده ول على حظي
-والله مني فاهمه اشي
-هو انت من وينتا بتفهمي يا حبيبتي
-انا شو دخلني في عنتر وفي عنزة ؟
-عنزة ؟



عدلت فتحيه من قعدتها وطالت عن الارض حجر استغفر الله بيجي خمسه كيلو حطته في ايدها ، قلت يا ولد خليني اهدي اللعب والله ان هبدتني فيه لتجيب خبري



-ولك يا غظيبه انا بحبك وبموت في دباديبك بس حبيت امتحنك واشوف شو ردة فعلك يا هبله هو انا الي فهالدنيا غيرك يا قزيعه وبعدين الجيزه قسمه ونصيب وصدقيني يا فتحيه ما بتدري وين هو نصيبك متظليش تفكري لانو اذا فكرت كثير بتنهبلي وانت مش ناقصك هبل يا حبيبتي
-ابتعرف ؟ كلامك ولوني مش فاهم ولا اشي منه بس حلو
-هو هذا الاشي الوحيد الي محببني فيكي ومصبرني عليكي



رمت الحجر من ايدها ووقفت وهي بتكت في بنطلونها الزهر ( استغفر الله بجوز غبرت نص الزرقا )



-طيب بدي اسألك سؤال : لليش النسوان الي بيجن يشوفني برجعنش ؟
-اه ... ؟ مشان اظل انا الي مبلي فيكي يا حياتي
-طيب احكيلي قصة قيس وعنزة
-قيس وعنزة ؟ بعدين .. بعدين .... روحي ... روحي هسا يالله اجعل عنزة الي توكل منخيرتش يا فتحيه
-قبل ما اروح بدي افاجأك مفاجأة
-الله يستر شو في ؟
-سجلت في محو الاميه
-شو ؟
-بتعرف ليش
-ليش يا عسل ؟
-لانه نفسي اصير افهم شو الحكي الي بتحكيه
- مصيبه اذا صرتي تفهمي
- شو


- لا مافي اشي ... يالله هوينا
-بااااااااي



( قالتها من هون والعصافير الي عالشجر طارت من هون ) وراحت وانتبهت بالصدفه وصرت انادي عليها



-فتحيه .... فتحيه
-مالك شو بدك ؟


-ولك تعالي خذي شبشبك مروحه حافيه الله يلعن حظي