كنتوا فين ؟

[Eng Amr Adel]

أنا كنت عايش خالى

وحدى ومش على بالى

كنت بأقضيها

حلوه مره بأعديها

ولما قلت يا حب

إتغيرت لاحوال

بدا عذاب القلب

وحالى مش الحال

حزن وسهر علطول

وليالى تطول وتطول

جراح وسهد وحيره

وهموم كبيره .. كبيره

كل شىء إتغير

والحلو طعمه إتمرر

عمر راح منى

وحبايبى ما راحمنى

كل الحاجات الغاليه

كانت فى السما عاليه

رخص خلاص تمنها

راحت وراح زمنها

واللى جاى زمن تانى

فيه المخلص أنانى

وفيه الوفى كداب

فى الغدر الحب داب

وإتلون بلون الهم

والجرح ما بيتلم

كل ما أقول هيطيب

يجينى تانى حبيب

ويجرحنى الجرح هوه

يجرحنى تانى بقوه

وتزيد الآلام وتزيد

والنار تقيد وتقيد

آه يا جرحى اللى واجع

آه يا زمن المواجع

فى عز ما أكون محتاج

إيدين تمسك إيديا

فى عز ما أكون محتاج

نظره كده بحنيه

بدل ما ألاقى الود

أنادى ومافيش رد

وتانى أرجع أنادى

أنا هنا فى ميعادى

ألاقى البعيد بيقرب

وأقرب قريب إتغرب

وأنا اللى كان حلمى

إنى فى عز ألمى

ألاقيهم هنا جنبى

اللى كانوا حبايبى

ولا حتى سمعوا الصوت

وأنا فى وحده وموت

مادد إيديا بطولها

وكلمه واحده بأقولها

رحتوا فين ؟

هوا إنتوا مش شايفين

حالى واللى بيا

قسيتوا ليه عليا

وغبتوا عن عيونى

وجيتوا تانى تفكرونى

بهوانا وعهدنا

بتقولوا فين ودنا

ما أنا ياما زمان ناديت

وكتير أوى مديت

إيدى عشان تاخدوها

عشان بإيديكم تشدوها

وتاخدونى من نارى

ولما قدرت أدارى

جراحى اللى وجعونى

تانى عاوزين ترجعونى

بعد مافات الوقت

جيتوا بقه دلوقت

جيتوا وأنا مقضيها

حلوه مره بأعديها

طيب كنتوا فين ؟

كنتوا فين ...

لما كنت بأدور

وأنا ما كنتش أتصور

ألاقيكم إنتوا تبعدوا

ألاقيكم بتجددوا

فيا الجرح القديم

جرحى المستديم

يا اللى إنتوا كنتوا الدوا

وكنتوا الغرام والهوا

يا اللى أنتوا كنتوا منى

بعدتوا ليه عنى ؟

هو فيه ظروف

تخلى حبيب ملهوف

يسيب حبيبه فى همه

يسيبه ولا يهمه

حتى من غير سؤال

وبعد ما إتغير الحال

بعد ما فات الوقت

جيتوا بقه دلوقت

جيتوا وأنا مقضيها

حلوه مره بأعديها

طيب كنتوا فين ؟