الاوراق المطلوبة لتجديد الرخصة الخاصة:
1- صورة البطاقة
2- شهادة باطنة ونظر وكل واحدة فيهم عليها صورة شخصية
3- نموذج 256
4- ملف ورق فاضي
5- رخصتك القديمة

خطوات تجديد رخصة القيادة :
1- بتشتري نموذج 256 من الخزينة هناك (7 جنيه)
2- بتروح نيابة المرور تدفع مخالفات علي رخصتك (5 جنيه بدون مخالفات) بتديهم النموذج والرخصة ويدوك شهادة مخالفات
3- تروح لشباك تجديد رخص القيادة تسلم ورقك يتراجع ويكتبلك ورقة بالرسوم (46 جنيه ونص)
4- تروح الخزينة تدفع الرسوم
5- ترجع للشباك بوصل دفع الرسوم والرخصة معاهم بيدبسها في الملف وياخد البطاقة
6- يراجع ورقك ويبعته لحجرة الكمبيوتر عشان تتصور
7- تستني لما اسمك يتنده وتتصور
8- وتستني تاني لحد ما يطبعوا الرخصة ويغلفوها ويندهوا علي الاسامي ويسلموك الرخصة والبطاقة

شهادة البيانات (عشان الرخصة الدولية) (اجمالي التكلفة 10 جنيهات)

1- صورة البطاقة
2- طلب شهادة بيانات من مكتب التصوير
3- صورة شخصية
خطوات استخراج شهادة البيانات:
1- بتروح لنفس الشباك بتاع التجديد وتديله الطلب ومعاه الصورة الشخصية ومعاه صورة البطاقة ويبعتك بورقه رسوم للخزينة
2- تدفع الرسوم وترجع تديله وصل الدفع عشان يطلعلك ملفك ويودي ورقك يتراجع
3- بيكتب الشهادة باسم وزارة الخارجية ويبعتها تتختم وتتغلف وبعدين يندهوا عليك للاستلام
اجمال الوقت في مرور السلام كان 3 ساعات ونص للرخصة والشهادة