ツ اوعى العطس يا عم الحاج.. بقلم احمد صلاح ツ

[Eng Amr Adel]

:d

تعيش البشرية كلها هذه الايام حالة من الذعر والقلق والخوف والرعب وقول حضرتك زى ما انت عاوز نتيجة انتشار وباء انفلونزا الخنازير ( وفى كلام عن انفلونزا الماعز ) ولا ننسى ابدا الابن البكرى فيروس انفلونزا الطيور

كل واحد خايف على روحه ومرعوب على اولاده كل واحد بيقول يارب وبيحاول يقى نفسه واسرته من خطر الاصابة بالانفلونزا بكل مشتقاتها الوبائية وكل يوم يقرأ مذكرة النصائح على الأولاد قبل الخروج وبعده وهناك من اصبح يخشى ارسال اولاده الى المدرسة او الجامعة وان كانت الغالبية العظمى ما زالت تطمئن بعض الشئ وتحاول ممارسة حياتها الطبيعية لكننا وعلينا ان نعترف بذلك اصبحنا اكثر حرصاً وحذراً فى معاملاتنا اليومية عما كنا من قبل

يعنى زمان لما كان حد بيعطس فى اوتبيس او ميكروباص كنا نتسارع فى قول يرحمكم الله مع ابتسامة خفيفة وبالكتير قوى تفتح الشباك اللى جنب حضرتك ولو واقف تودى وشك الناحية التانية دقيقة ولا حاجة على ما اثر العطسة يروح لكن دلوقتى ساعة ما حد يعطس يا خبر مالوش الوان الاتوبيس كله يصاب بالرعب وكل واحد يدور على حتى يهرب فيها وبدل مايفتح الشباك شويه تلاقى رأسه كلها بره ولو واحد واقف يبقى حلم حياته يقفز ناجياً بحياته التى اصبحت على المحك ولسان حاله بيقول ابوس ايدك يا باشا

انا عندى عيال عايز اربيهم الهى ربنا ما يرميك فى ضيقة

اصبحنا نتفادى ان نقترب ممن يحدثنا اكثر من اللازم مادام سامعين بعض خلاص ولو الطرف التانى عنده برد يبقى نتكلم فى شهر تانى ولا بلاش احسن

ولو واحد بيكلم حبيبته فى التليفون وفجأة سمعها بتعطس بعد ما طلبت منه ينزل يقابلها ضرورى تجده بسرعة يقولها معلش ياعمرى بابا وماما سافروا البلد ومقدرش اسيب اخواتى لوحدهم
تقوله طيب راحعين امتى يقولها اسبوعين بالكتير تستسلم المسكينة هامسة خلاص اشوفك بعد اسبوعين يرد صاحبنا فى سره لو فضلت عايشه

ويا سلام لو واحد زهقان من مراته وحاسس انها اتقل من جبل المقطم وهضبة الاهرام على صدره ووجدها نازلة عطس طبعا ده يبقى اسعد يوم فى عمره على اساس انها جت من عند ربنا وعلى طول ياخدها فرصة ويقولها بقولك يا حبيبتى انت تعبانة ولازم تستريحى عشان كده انا بقول تاخدى شنطة هدومك وتروحى تقعدى عند حماتى شهرين تلاته تاخد بالها منك ويكمل برضه فى سره مش جايز تاخديها فى ايدك والله يبقى اكبر خير عملتوه فى حياتكم

طبعا انا بحاول هنا اخفف حدة الضغط الذى نشعر به بشده هذه الايام والذى لا يجب ابدا ان يتحول الى هيستريا انا معكم فى اهمية ان نخاف ونحترس ونأخذ احتياطنا لكن دون ان يؤثر هذا على حياتنا بأى صورة يعنى ناخد بالنا ونسيب الباقى على الله وسبحانه يفرجها من عنده ويرفع عنا هذا البلاء

بقلم

احمد صلاح محمود